|
Mae Cyngor yr ysgol, dan arweiniad Mr Iolo Owen, Jason Lewis a Cheryl Owen, yn cydweithio gyda Swyddog Diogelwch Gwynedd, Mr Colin Jones a Mr Richard Glyn Jones ar y prosiect hwn. Bwriad y cynllun yw annog disgyblion i gerdded neu feicio i'r ysgol. Yn ogystal ag edrych ar ffyrdd diogel i deithio i'r ysgol mae'r disgyblion hefyd yn awyddus i ddatblygu llwybr beics sy'n cysylltu Trawsfynydd, Gellilydan, Llan Ffestiniog a Blaenau Ffestiniog. Gellid gwneud hyn yn rhwydd iawn trwy addasu'r lein rheilffordd bresennol yn llwybr beicio saff a deniadol. Y gobaith yn y dyfodol yw y bydd disgyblion yr ysgol yn gallu cadw'n heini ar lwybr diogel wrth deithio i'r ysgol. Fel rhan o'r prosiect, mae'r disgyblion hefyd yn ystyried y manteision economaidd a fyddai yn dod i'r ardal yn sgîl y llwybr. Yn sicr, byddai llwybr o'r fath yn welliant sylweddol at y llanast a'r sbwriel a welir ar y lein ar hyn o bryd!
 |
Ìý
