Bob wythnos ar Cinio Caru bydd un person sengl yn cael cyfle i fwynhau pryd o fwyd blasus mewn lleoliad rhamantus, gwesty Castell Deudraeth ym Mhortmeirion. Bydd y person lwcus yma yn rhannu pob un o'r tri chwrs gyda pherson sengl gwahanol.Bydd y pryd cyfan yn cael ei ffilmio, gydag ymgynghorydd seicolegol y gyfres, Dr Mair Edwards, yn gwylio ac yn dadansoddi pob symudiad yng nghwmni cyflwynydd Cinio Caru, Ffion Dafis. Ar ddiwedd y pryd, bydd y person yn dewis pa un o'r tair neu dri fydd yn ymuno ag ef/hi ar benwythnos rhamantus dramor.
Yn rhaglen gyntaf y gyfres bydd Arwel Jones o bentref Glan-yr-afon ger Corwen yn mwynhau cwrs cyntaf yng nghwmni Si芒n Rhun Griffiths o Benmachno ger Llanrwst; prif gwrs yng nghwmni Nia Williams o Gei Newydd a'r pwdin gyda Karen Williams o Gaernarfon. Gyda chyngor doeth Dr Mair a Ffion Dafis yn atseinio yn ei glustiau, pa ferch fydd o'n ei dewis ar gyfer gwyliau penwythnos yn Oslo?
Cafodd Dr Mair, seicolegydd ymgynghorol Cinio Caru, ei geni yn y Waun a'i magu yn Llanarmon, Dyffryn Ceiriog a'r Henllan ger Dinbych; mae bellach yn byw ym Mangor. Mae'n gweithio ar ei liwt ei hun fel seicolegydd clinigol, gan arbenigo mewn gweithio gyda theuluoedd sydd 芒 phlant mewn trafferthion. Mae hefyd yn ddarlithydd er anrhydedd gyda'r Brifysgol ym Mangor. Dywed mai ei diddordebau yw cerddoriaeth o bob math, 'o Mozart i'r Manics' a 'gwylio pobol!'
Bydd Dr Mair yn cael digonedd o gyfle i wylio pobol yn ystod y gyfres hon! Dywed fod iaith y corff yn siarad cyfrolau.
"Er ein bod ni'n meddwl ein bod ni'n dibynnu ar wybodaeth lafar wrth gyfathrebu, mi rydan ni'n anifeiliaid, ac mae anifeiliaid yn dangos eu teimladau trwy symudiadau'r corff. Heb sylweddoli hynny, mi rydan ni'n arbennig o dda am ddarllen negeseuon corfforol rhywun arall. Mae llawer o waith ymchwil wedi ei wneud ar hyn ac mae'n debyg bod symudiadau bach cyflym yn dangos sut mae rhywun yn ymateb i berson arall.
"Wrth wylio'r rhai sy'n cymryd rhan yn Cinio Caru fe welwch chi fod cyswllt llygaid yn allweddol. Hefyd, edrychwch os ydyn nhw'n dynwared ei gilydd, fel petaen nhw'n edrych mewn drych. Mae hyn yn dangos eu bod nhw'n awyddus i blesio'r naill a'r llall. Os ydy braich yn mynd ar draws y corff, tydy hynny ddim yn arwydd da. Y pethau bach sy'n cyfri. Mae'n ddiddorol sylwi hefyd ar sut mae pobol yn ymddwyn pan maen nhw'n nerfus.
"Dwi'n meddwl y bydd rhai o'r cyfranwyr yn cael sioc wrth weld eu hunain ar y teledu, tydyn ni ddim wastad yn sylweddoli sut rydan ni'n ymddangos i berson arall. Efallai o weld eu hunain, bydd rhai ohonyn nhw yn sylwi ar bethe y medran nhw eu newid yn y ffordd maen nhw'n cyfathrebu!"
Cinio Caru Nos Fercher, 9 Mehefin,11.00pm, S4C digidol
Nos Wener, 11 Mehefin, 10.30pm, S4C
